बिहिबार, १४ श्रावन २०७८

कोरोना खोप उत्पादक तीन कम्पनीले मागे नेपालमा आपतकालिन प्रयोग अनुमति

अनुमति लगत्तै चीनको खोप पनि नेपाल आउने



काठमाडौं । कोरोना भाइरस विरुद्धको खोप आपतकालिन प्रयोगको अनुमतीका लागि ३ वटा खोप निर्माताले नेपालसँग अनुमति मागेका छन् ।

भारतको बायोटेक कम्पनीले उत्पादन गरेको कोभ्याक्सिन, रसियाले उत्पादन गरेको स्पुतनिक र चीनले उत्पादन गरेको सिनोफार्म खोप निर्माताले आपतकालिन प्रयोग गर्न नेपाल सरकारसँग अनुमति मागका हुन् ।

औषधी व्यवस्था विभागले यी ३ वटै खोप निर्माताले आवश्यक कागजात पेश गरि आपतकालिन प्रयोगको अनुमती मागेपछि पेश भएका कागजातहरू अध्ययन भइरहेको जनाएको छ ।

हाल नेपालमा अक्सफोर्ड–एस्ट्राजेनेकाले उत्पादन गरेको र भारतको सेरम कम्पनीले बनाएको कोभिसिल्ड खोपले मात्रै आपतकालिन प्रयोग अनुमति पाएको छ ।

नेपालले आपतकालिन प्रयोगको अनुमति दिएसँगै माघको पहिलो हप्ता भारतले कोभिसिल्ड खोप १० लाख भाइल अनुदानमा दिएको थियो । सो खोप उपलब्ध भएसँगै नेपालमा गत माघ १४ गतेदेखि कोरोनाविरुद्धको खोप अभियान थालिएको हो।

चीन सरकारले पनि नेपाललाई माघ २४ गते कोभिड विरुद्धको ५ लाख डोज खोप प्रदान गर्ने घोषणा गरेको थियो। यो घोषणा गरेसँगै काठमाडौंस्थित चीनियाँ दूतावासले कोरोनाविरुद्धको खोप सिनोफार्म नेपालमा आपतकालीन प्रयोगका निम्ति अनुमति मागेको हो। केही दिनमै चीनले दिने खोप नेपालमा आउने हुँदा छिट्टै आपतकालीन प्रयोगका लागि स्वीकृति दिन दूतावासले औषधि व्यवस्था विभागलाई पत्राचार गरेको हो।

विभागका अनुसार हाल सिनोफार्मको खोप आपतकालीन प्रयोग गर्न अनुमति माग्दै केही कागजात पेश गरिसकेको छ भने केही आउने प्रकृयामा रहेको र सो पूरा भएमा आपतकालिन प्रयोग निम्ति अनुमति दिने जनाइएको छ ।

प्रतिक्रिया दिनुहोस